Agus carrchlós an tsiopa Woodies DIY lán, bíonn a fhios agat go bhfuil an t-earrach tagtha in Éirinn. Tá Déan Féin É mar chuid lárnach den saol na laethanta seo, agus creid é nó ná creid, is féidir úsáid a bhaint as an idirlíon chun leaideanna a aimsiú a bheidh ina gcuidiú duit agus tú ag iarraidh an obair a dhéanamh ar bhealach níos éasca – agus níos saoire.Má tá comhairle uait maidir leis an mbealach is fearr le rud ar leith a dhéanamh, is cinnte go bhfuil eolas ar fáil ar an idirlíon mar gheall air – níl ag teastáil ach cuardach tapa ar Google. Ní hamháin sin, ach gach seans go bhfuil físeán ar fáil faoi pé rud is mian leat a dhéanamh. Míneoidh sé duit, céim ar chéim, cén chaoi ar chóir duit tabhairt faoin jab – níl ag teastáil ach cuardach tapa ar YouTube nó About.com.Céim amháin chun tosaigh is ea treoir theicniúil a fháil maidir le conas péint a chur ar bhalla. Ach cad mar gheall ar chúrsaí níos cruthaithí – an dóigh is fearr le dathanna péinte a roghnú, cuir i gcás.Iontas na n-iontas, tá cabhair ar fáil maidir leis na cúrsaí seo freisin. Is éard atá i gceist ná feidhmchlár ríomhaireachta a ligeann duit seomra a "phéinteáil" ar do ríomhaire. Ma bhaineann tú úsáid as an bhfeidhmchlár seo, is féidir leat buille faoi thuairim a fháil roimh ré maidir leis an gcuma a bheadh ar do sheomra dá roghnófá dathanna áirithe – agus ní gá duit pingin a chaitheamh!MousePainterBainim féin úsáid as an tseirbhís MousePainter atá curtha ar líne ag Dulux (www.dulux.ie/colours/mousepainter/index.jsp). Tá an comhéadan seo an-éasca a úsáid – tá grianghraif dhubha agus bhána de sheomraí éagsúla ar an suíomh, agus

roghnaíonn tú cibé ceann atá cosúil le do sheomra féin. Ansin, má tá dathanna ar leith i gceist i do sheomra – dath an troscáin nó dath na gcuirtíní, cuir i gcás – is féidir na dathanna sin a phéinteáil isteach. Agus an bhunobair seo déanta agat, cuirtear tús leis an spraoi! Is féidir a bheith ag pleidhcíocht leis na dathanna eile ar fad agus ní gá duit ach an luch a úsáid chun balla iomlán a phéinteáil agus triail a bhaint as dathanna éagsúla.Ar ndóigh, ní bheidh na dathanna ar scáileán do ríomhaire díreach cosúil leis an dath a bheidh ar an bpéint i ndáiríre, ach tugann an feidhmchlár tuairim mhaith duit maidir leis na samplaí péinte ar fiú duit do chuid airgid a chaitheamh orthu agus triail cheart a bhaint astu. Tá cabhair ar fáil chomh maith más ag déanamh oibre sa ghairdín atá tú. Is breá liom an suíomh garraíodóireachta atá curtha ar fáil ag an BBC (www.bbc.co.uk/gardening). Ní hamháin go bhfuil grianghraif le feiceáil ar an suíomh de raon leathan gairdíní – rud a thugann deis duit taighde a dhéanamh agus smaointe a ghoid – ach is féidir leat gairdín nua a chruthú i bhfoirm 3T leis an áis Virtual Garden.Caithfidh mé a admháil go bhfuil sé casta go leor gairdín fíorúil a chruthú leis an mbogearra seo, ach is fiú an tairbhe an trioblóid. Tugann sé deis duit do ghairdín féin a phleanáil agus a chruthú tar éis duit sonraí bunúsacha a ionchur – láthair agus méid na mballaí, cuir i gcás. Is féidir plandaí agus crainn a chur i do rogha

áite agus is féidir iad a bhogadh timpeall go héasca, má theastaíonn uait é sin a dhéanamh.Chuir sé iontas orm ar dtús nach raibh rogha níos leithne crann agus plandaí ar fáil san fheidhmchlár, ach thuig mé i ndiaidh dom triail a bhaint as gur cabhair mhór don úsáideoir é go bhfuil sé socraithe ar an mbealach sin. Leis an gcur chuige seo, tá an bhéim leagtha ar dhearadh an ghairdín, in ionad í a bheith leagtha ar mhionsonraí mar do rogha crann agus plandaí. Is fiú go mór rudaí a choinneáil simplí agus gairdín nua á chruthú agat.B’fhéidir gurb é sin an rud is fearr faoin eolas agus faoin gcomhairle seo ar fad atá ar fáil ar an idirlíon: is féidir linn a bheith ag foghlaim ó na botúin atá déanta ag daoine eile agus na fadhbanna a tháinig chun cinn agus iad i mbun oibre sa teach a sheachaint – rud a shábhálann a lán stró, agus níos mó airgid.

Tá GaelSpell 2007, leagan nua den litreoir cáiliúil a oibríonn le Microsoft Office 2007, díreach foilsithe ag Diarmaid Mac Mathúna ag www.cruinneog.com, i bpáirt le Kevin Scanell. Tá Diarmaid i gceannas ar chúrsaí léiriúcháin sa chomhlacht teilifíse Agtel (www.agtel.ie).