CÚRSAÍ TEICNEOLAÍOCHTA
Dúshlán á thabhairt do Google
Diarmaid Mac Mathúna Diarmaid Mac Mathúna Diarmaid Mac Mathúna

Bíonn sé de nós againn www.google.ie a chlóscríobh go huathoibríoch agus eolas á lorg againn. Ach tá innill chuardaigh anois ar fáil atá níos éifeachtaí agus níos tarraingtí, mar a mhíníonn Diarmuid Mac Mathúna.

Íomhá
Íomhá
Is féidir cuid mhaith den eolas atá ag teastáil uait a fháil láithreach bonn ar zoominfo.com
Íomhá
Bunachar luachmhar de théarmaí Gaeilge is ea focal.ie

Tá mé bréan de bheith ag úsáid Google. Tá mé tuirseach den liosta fada torthaí a fhaighim nuair a dhéanaim rud éigin a chuardach. Ní thagann ach téacs leadránach chun cinn de ghnáth, agus go minic ní bhaineann na torthaí le hábhar. Mar sin, bhí an-áthas orm le déanaí nuair a tháinig mé ar innill éagsúla chuardaigh atá níos fearr. Ní hamháin go bhfaigheann tú torthaí níos fearr tar éis duit rud éigin a chuardach, ach tá cuma níos fearr orthu freisin toisc go bhfuil comhéadain ghrafacha acu ina dtaispeántar gach rud i bhfoirm íomhánna deasa.Mar shampla, agus mé ag déanamh taighde d’alt, bím ag lorg eolais faoi dhaoine ó am go ham. Má dhéanaim ainm duine faoi leith a chuardach ar Google ní fhaighim mórán eolais ina thaobh, ach amháin liosta na leathanach a bhfuil sé luaite orthu – idir thagairtí do rudaí atá ráite aige agus scéalta nuachta. Ní bhíonn ord ar bith ar an liosta agus tógann sé tamall orm eolas a fháil maidir leis an bpost atá ag an duine, an comhlacht a bhfuil sé bainteach leis agus, fiú amháin, an seoladh ríomhphoist atá aige.Ach má bhainim úsáid as innill chuardaigh ar nós Pipl (www.pipl.com) nó Zoominfo (www.zoominfo.com) faighim cuid mhaith den eolas atá uaim láithreach bonn. Má dhéanann tú duine faoi leith a chuardach le leithéidí Pipl nó Zoominfo, tagann liosta na ndaoine a bhfuil an t-ainm áirithe sin orthu chun cinn, mar aon le nóta beag mar gheall orthu. Is féidir leat an té atá á lorg agat a roghnú ón liosta. Agus an duine cuí roghnaithe agat, taispeánfar níos mó eolais faoi. Ar ndóigh, tá i bhfad níos mó eolais ar fáil sna hinnill chuardaigh seo faoi dhaoine a bhfuil cónaí orthu sna Stáit Aontaithe faoi láthair, ach tá eolas úsáideach ar fáil iontu faoi dhaoine a bhfuil cónaí orthu in Éirinn leis.

Agus eolas ginearálta á lorg agam maidir le comhlacht nó le hábhar faoi leith, bainim úsáid as na suíomhanna KartOO (www.kartoo.com) agus Quintura (www.quintura.com) na laethanta seo. Is suíomhanna iad seo ina dtaispeántar eolas i bhfoirm dheas ghrafach, in ionad mar dhlúthliosta téacs. Tá stíl bhreá, bhríomhar agus ildathach le feiceáil ar an suíomh KartOO. Trí chomhéadan grafach an tsuímh seo, cuirtear ar chumas an úsáideora "dul ag tochailt" le haghaidh an eolais atá ag teastáil uaidh mar gur féidir leis a luch a úsáid chun bogadh timpeall "léarscáil" na dtorthaí éagsúla. Is dócha go bhfuil cuma chasta ar an méid sin don léitheoir – tá sé deacair cur síos a dhéanamh air anseo. Ach má bhaineann tú triail as ar feadh cúpla nóiméad, braithfidh sé breá nádúrtha.Suíomhanna gaolmharaNí hionann Quintura agus KartOO ó thaobh leagan amach de, ach arís, agus Quintura á úsáid agat, is féidir brabhsáil thart timpeall an ábhair atá á lorg agat agus aimseoidh tú suíomhanna agus eochairfhocail atá bainteach leis an ábhar sin go tapa. Taispeánann an t-inneall cuardaigh seo torthaí na gcuardach i bhfoirm scamall clibe. Is éard atá i gceist leis sin ná go dtagann na téarmaí a lorgaíonn tú chun cinn i lár an scáileáin agus ansin tagann focail atá bainteach leo chun cinn timpeall na dtéarmaí sin. Mar shampla, má dhéanaim an focal "Obama" a chuardach, tiocfaidh "Hilary Clinton" chun cinn go tapa in aice leis sa scamall. Cabhraíonn an saghas seo cuardaigh ghrafaigh go mór le duine agus é ag iarraidh taighde a dhéanamh ar ábhar go tapa toisc go bhfaigheann sé eolas láithreach bonn, ní hamháin i dtaobh an ábhair atá á chuardach aige ach i dtaobh na n-ábhar gaolmhar ar fad chomh maith – agus ní gá go mbeadh an t-úsáideoir eolach ar na hábhair ghaolmhara roimh ré.

Agus, ar ndóigh, tá inneall cuardaigh anois ar fáil atá dírithe ar lucht na Gaeilge. Cabhraíonn sé go mór le cúrsaí aistriúcháin agus araile. Is fiú go mór cuairt a thabhairt ar www.aimsigh.com (ba chóir dom a rá ag an bpointe seo gurbh é Kevin Scannell a chruthaigh aimsigh.com, an fear céanna a mbím ag obair leis ar an litreoir GaelSpell agus ar an ngramadóir Ceart). Is fiú fosta cuairt a thabhairt ar www.focal.ie, ar bunachar sonraí de théarmaí Gaeilge é atá cruthaithe ag Fiontar ar bhonn tionscadail d’Fhoras na Gaeilge.Léiríonn raon leathan na n-inneall cuardaigh atá ar fáil na laethanta seo gur féidir linn anois inneall faoi leith a roghnú le haghaidh cuardaigh faoi leith, agus gheobhaimid eolas níos fearr ar luas níos tapúla. Agus b’fhéidir, fiú amháin, go n-úsáidfidh mé Google ó am go ham amach anseo ...

Tá GaelSpell 2007, leagan nua den litreoir cáiliúil a oibríonn le Microsoft Office 2007, díreach foilsithe ag Diarmaid Mac Mathúna ag *www.cruinneog.com, i bpáirt le Kevin Scanell. Tá Diarmaid i gceannas ar chúrsaí léiriúcháin sa chomhlacht teilifíse Agtel (www.agtel.ie).*

RSS FREAGRAÍ NA LÉITHEOIRÍ  

© Oideas Gael, 2010. Cosc ar chóipeáil. Ní gá go mbeadh na tuairimí a nochtar i mBeo! ar aon dul le tuairimí na bhfoilsitheoirí. Suíomh cóirithe ag MBM. Úsáidtear grafaicí de chuid Fam Fam Fam agus Wikimedia Commons ar an láithreán seo.