CÚINNE NA nEALAÍON/AG LÉAMH DOM
QuickGuide™ Irish Grammar
Sarah Ní Chonchobhair Sarah Ní Chonchobhair Sarah Ní Chonchobhair

Bhí Sarah Ní Chonchobhair ag féachaint áis foghlama úr de chuid Gaelchultúr ar na mallaibh.

Ag deireadh mí Eanáir foilsíodh áis nua foghlama QuickGuide™ Irish Grammar. Is iad Éamonn Ó Dónaill, Stiúrthóir Oideachais Ghaelchultúr agus a chomhghleacaí Helen Hegarty, údair na háise seo. Bhí a leithéid ann cheana ar mhéid A4 agus ba chliste an áis é, ach caithfidh sé go bhfuil an QuickGuide seo a sé nó ocht n-oiread níos mó ná é tharla gur i gcruth fillte atá sé, rud a chiallaíonn gur thig leat é a leathnú amach de réir mar a thogrófas tú teacht ar réim áirithe eolais. Dírítear ar na príomhghnéithe de ghramadach na Gaeilge sa chárta sracfhéachana seo. Cosnaíonn an QuickGuide €9.95 agus tá sé ar fáil ag Siopa. Lena chois sin, tá cúrsa idirghníomhach chomh maith atá bunaithe ar QuickGuide™ Irish Grammar ar fáil ag Ranganna ar an gcostas céanna (€9.95). Tá 11 aonad sa chúrsa idirghníomhach agus freagraíonn gach ceann acu don leathanach leis an uimhir chéanna sa QuickGuide™ Irish Grammar. Ciallaíonn sé sin gur féidir leis an bhfoghlaimeoir feidhm a bhaint as spás foghlama tríthoiseach. Is é príomhaidhm an QuickGuide ná Gramadach na Gaeilge a shoiléiriú don phobal i gcoitinne.

Cuireann QuickGuide™ Irish Grammar na heilimintí is lárnaí de ghramadach na Gaeilge faoi bhráid an fhoghlaimeora ar bhealach soiléir, sothuigthe. I measc na ngnéithe lárnacha léirithe ann tá an t-alt agus inscne ainmfhocail; an tuiseal ginideach, an chopail ‘is’; briathra rialta agus na cinn neamhrialta; foghraíocht agus litriú; míonna agus laethanta; suíomh agus gluaiseacht; na hairde; aidiachtaí; uimhreacha ; forainmneacha pearsanta; forainmneacha réamhfhoclacha; aidiachtaí sealbhacha; réamhfhocail shimplí; réamhfhocail shimplí móide an t-alt.

Cuma agus Dearadh

Tá cuma gheal, taitneamhach ar an treoir ghramadaí seo. Tá sé deartha ar nós coirdín, mionfhillte agus ar ndóigh, baineadh feidhm as dhá thaobh an chárta, nó fillteán is fearr, b’fhéidir, a thabhairt air. Tugtar dath faoi leith do gach gné ghramadaí. Is féidir leis an bhfoghlaimeoir an t-eolas a aimsiú go tapa mar gheall ar an scéim dathanna. Mar gheall ar dhearadh úr paiteanta an fhillteáin sracfhéachana seo, an QuickGuide™ Irish Grammar, is áis é atá an-éasca a úsáid. Cuirim i gcás, má bhíonn eolas ar an tuiseal ginideach uatha uait, tá na sonraí go léir ar fáil sa rannóg ghlas. Baintear úsáid as na dathanna seo ar mhaithe le simplíocht agus soiléire. Músclaíonn na dathanna cuimhne an fhoghlaimeora agus ar ndóigh, cuireann siad na gnéithe gramadaí i gcuimhne d’fhoghlaimeoir. Úsáidtear an cló dearg chun an tslí a réitíonn an aidiacht leis an ainmfhocal de réir tuisil agus inscne a thaispeáint nó a chur i láthair.

Thar aon ní eile is áis tagartha é QuickGuide™ Irish Grammar atá furasta a iompar ach mar gheall ar an bpáipéar lannaithe, tá sé láidir agus seasfaidh sé saol fada láimhseála. Bheadh fillteán gramadaí mar seo go feidhmiúil ar fad, ní hamháin do scoláirí meánscoile agus tríú leibhéal mar aon, ach do mhúinteoirí agus do dhaoine atá ag iarraidh an cuidiú chun cruinnis sa chaint agus sa scríobh a bheith ar aghaidh boise acu.

Scríobhtar na míniúcháin ghramadaí i mBéarla agus tugtar na samplaí go léir as Gaeilge. Éiríonn leis na húdair béarlagair traidisiúnta na gramadaí a sheachaint go huile is go hiomlán sa QuickGuide™ Irish Grammar. Mar sin bíonn sé níos éasca d’fhoghlaimeoir, bíodh sé óg nó aosta, teacht go nádúrtha ar ghramadach na Gaeilge. Tá an bhéim ann ar an teanga laethúil agus ar fhocail agus ar nathanna coitianta.

Mar gheall ar sin tá QuickGuide™ Irish Grammar oiriúnach do bhunfhoghlaimeoirí agus dóibh siúd a bhfuil Gaeilge ar a gcumas acu. Is céim chun tosaigh é agus tá QuickGuide™ Irish Grammar níos cuimsithí ná na cártaí gramadaí eile atá ar fáil faoi láthair. Is treoir fhorleathan atá i gceist leis an QuickGuide. Ba chabhair mhór é an QuickGuide ag an té úd atá ag iarraidh dul i dtaithí ar ghnéithe lárnacha i ngramadach na Gaeilge ar iompú na boise. Molaim go mór é óir is mór an leas a dhéanfaidh sé feasta i saol lucht foghlama na Gaeilge.

QuickGuide™ Irish Grammar €9.95

MAIDIR LEIS AN ÚDAR

Is as Sligeach an Dr. Ní Chonchobhair agus tá sí ag obair i gCeanada faoi láthair.

RSS FREAGRAÍ NA LÉITHEOIRÍ  

© Oideas Gael, 2010. Cosc ar chóipeáil. Ní gá go mbeadh na tuairimí a nochtar i mBeo! ar aon dul le tuairimí na bhfoilsitheoirí. Suíomh cóirithe ag MBM. Úsáidtear grafaicí de chuid Fam Fam Fam agus Wikimedia Commons ar an láithreán seo.