CÚINNE NA nEALAÍON
Fleadh Cheoil na hÉireann Cois Feabhail i 2013
Ciara Nic Gabhann Ciara Nic Gabhann Ciara Nic Gabhann

Tá Ciara Nic Gabhann ag dréim go mór le Fleadh Cheoil na hÉireann a fheiceáil i nDoire Chalgaigh an bhliain seo chugainn.

Íomhá
Sa Chabhán anuraidh
Íomhá
Cantóirí Loch Garman ag ceol amhráin anuraidh
Íomhá
Torthaí arú anuraidh
Íomhá
Taifeadadh na Fleidhe le John Creedon arú anuraidh

Is fada an bóthar nach bhfuil casadh ann agus is cinnte gur sin mar a mhothaigh craobh Dhoire de Chomhaltas Ceoltóirí Éireann, nuair a bhris an scéal ar na mallaibh gur éirigh lena n-iarratas, faoi dheireadh thiar, Fleadh Cheoil na hÉireann a thabhairt chuig a gcathair i 2013. Thosaigh an iomaíocht dhá bhliain ó shin agus bhí an comórtas, ar feadh i bhfad, idir Sligeach, Inis agus Doire go dtí gur sheas Inis siar ag an bhomaite dheiridh.

Is é seo an chéad uair don fhleadh náisiúnta a bheith ag teacht trasna na Teorann ó bunaíodh an Comhaltas i 1951 agus, mar a tharlaíonn sé, an chéad uair don fhleadh seo a bheith lonnaithe in aon chathair sa tír. Is mór an t-údar mórtais ag muintir Dhoire é seo. Is mór an teist é ar an diograis a bhí taobh thiar den iarratas a cuireadh le chéile le Fleadh Cheoil na hÉireann a thabhairt aneas. Aitheantas é fosta ón Chomhaltas féin ar an neart agus fuinneamh atá i dtraidisún ceoil na cathrach agus ar an rath a bhí ar na hiarrachtaí le blianta beaga anuas an ghné Ghaelach den traidisiún a chur os ard.

Dúirt an Seanadóir Labhrás Ó Murchú, ardstiúrthóir an Chomhaltais, gur mór an ról a bhí ag muintír an tuaiscirt riamh anall i dtraidisiún cultúir na hÉireann a thabhairt chun cinn agus gur bealach a bhí sa chinneadh seo buíochas a ghabháil le achan duine a bhí rannpháirteach ann. Dúirt sé fosta gur deis a bhi ann ceiliúradh a dhéanamh ar na traidisiúin éagsúla a mhaireann ar oileán na hÉireann agus go raibh sé ag súil go mbeadh sé seo ina phriomhchuspóir ag an Fhleadh i nDoire.

Cathair Chultúrtha na Ríochta Aontaithe

Ba é Doire an chéad chathair ar ar bronnadh an teideal Cathair Chultúrtha na Ríochta Aontaithe agus beidh sé aici don bhliain 2013 agus beidh an Fhleadh ar an imeacht is suntasaí i measc lear mór imeachtaí cultúrtha/ealaíonta a bheidh ag tarlú ansin i rith na bliana sin.

Le linn don iarratas ar an teideal seo a bheith á ullmhú, rinneadh plé agus díospóireacht an-bhríomhar ar cé acu ar cheart do Dhoire a bheith ar lorg aon teideal a bhain leis an Ríocht Aontaithe. Is náisiúnaithe / poblachtaigh b’fhéidir 80% de phobal na cathrach anois agus gan mórán aird acu ar ríochtaí aontachtaithe, ach tá mionlach aontachtach fós sa chathair agus is tábhachtach leis an chathair an mionlach sin a aithint agus féacháil lena dhlúthú leis an chuid eile den phobal.

Is ar an ábhar sin a bhí cothú na héagsúlachta luaite mar lárchuspóir sa chás a rinne an chathair ar son an teidil seo, agus is léir go ndeachaigh an cás sin i bhfeidhm ar an choiste bhreithiúna, nó bhronn siad an teideal ar an chathair cois Feabhail. Ar ndóigh, is fiú a chuimhneamh go mbíonn go leor fadhbanna agus dúshláin ag cathracha na Breataine maidir le héagsúlachtaí a aithint agus le ciníochas a sheachaint, agus is cosúil nár aithníodh a dtábhacht siúd sna hiarrataisí eile a cuireadh isteach an oiread is a rinne Doire.

An Chaoinfhulaingt

Dúirt Gearóid Ó hEára, stiúrthóir Chultúrlann Uí Chanáin [sic] - príomhionad na Gaeilge i nDoire - go raibh sé ag súil go mór le fleadh a dhéanfaidh ceiliúradh ar achan ghné de chultúr traidisiúnta na cathrach. Dúirt sé chomh maith go raibh tacaíocht ann don togra ó dhreamanna difriúla i measc an phobail Aontachtaigh sa chathair e.g. na Printísigh agus na páirtithe polaitíochta.

Is fada siar anois a thosaigh dhá thaobh an phobail i nDoire ag teacht i ndáil comhairle lena chéile lena gcuid fadhbanna a réiteach. Ba í Doire an chéad áit sa Tuaisceart inar tharla mórshiúl de chuid na n-ord Protastúnach – sa chás seo Printisigh Dhoire - le cead agus beannacht an phobail Chaitlicigh. Tarlaíonn na mórshiúlta sin achan bhliain anois agus is go síochánta a tharlaíonn siad.

Is ealaín í an chaoinfhulaingt atá foghlamtha go maith i nDoire anois. Tuigtear nach bhfuil aon sárú prionsabail i gceist nuair a aithnítear cearta na comharsan agus nuair a thugtar slí dósan fosta a rud sainiúil féin a dhéanamh.

Is láidre agus is saibhre agus is suntasaí go mór a bheidh Fleadh Cheoil na hÉireann i 2013 de bhrí go mbeidh na gnéithe eile seo ann. Chomh maith leis sin, beidh cuma spleodrach ar an chathair, í cóirithe go húrnua le haghaidh Bhliain an Chultúir, spásanna úrnua siamsaíochta anseo is ansiúd ar fud na cathrach agus fáilte Uí Dhochartaigh (is líonmhaire na Dochartaigh ná muintir Uí Cheallaigh i nDoire agus tá a bhfáilte siúd lán chomh fial) roimh óg agus aosta.

RSS FREAGRAÍ NA LÉITHEOIRÍ  

© Oideas Gael, 2010. Cosc ar chóipeáil. Ní gá go mbeadh na tuairimí a nochtar i mBeo! ar aon dul le tuairimí na bhfoilsitheoirí. Suíomh cóirithe ag MBM. Úsáidtear grafaicí de chuid Fam Fam Fam agus Wikimedia Commons ar an láithreán seo.