THALL IS ABHUS/LAETHANTA SAOIRE
Cosa siúlacha!
Máire Ní Chuagáin Máire Ní Chuagáin

Beidh Máire Ní Chuagáin ag tabhairt aghaidhe ar an Afraic an mhí seo agus ar an Áis níos moille sa bhliain agus beidh sí ag scríobh tuairiscí rialta do Beo! mar gheall ar na heachtraí a thitfidh amach le linn a cuid taistil. An mhí seo, míníonn sé cén t-ullmhúchán atá ar bun aige le tamall anuas.

Íomhá
Séabra i bPáirc Náisiúnta Kruger
Íomhá
Máire Ní Chuagáin (ar dheis) ag súgradh le páistí le linn di bheith ag obair go deonach i nGána anuraidh
Íomhá

Tháinig fonn mór siúil orm anuraidh agus ba bheag amhras a bhí orm nuair a thuirling mé arís i mBaile Átha Cliath an samhradh seo caite, tar éis ceithre mhí a chaitheamh san Afraic, ach go mbeinn ag iarraidh dul ag taisteal arís. Bhí greim ag an bhfonn taistil ort agus, nuair a tharlaíonn sé sin, is deacair fáil réidh leis!

Cuireadh síol an phlean taistil atá agam anois i mbrú óige taobh amuigh de Pháirc Náisiúnta Kruger san Afraic Theas mí an Mheithimh seo caite, ach tá an plean athraithe ar a laghad fiche uair ó shin. Turas timpeall na Céinia agus na Tansáine; sé mhí ag obair go deonach le hainmhithe; trí mhí ag obair le páistí sa Mhaláiv; turas timpeall na Botsuáine agus na Namaibe – tá na céadta féidearthacht tar éis teacht isteach i m’intinn! Sa deireadh, shocraigh mé ar thrí seachtaine a chaitheamh i nGána ag tabhairt cuairte ar an teach cónaithe ina raibh mé lonnaithe anuraidh agus ansin dul ó dheas agus coicís a chaitheamh ar an trá i Mósaimbíc. Caithfidh mé mí in Enkosini (www.enkosiniecoexperience.com) san Afraic Theas, ag cur leis an taithí a fuair mé ansin anuraidh, agus ansin buailfidh mé féin agus mo chara Sophia bóthar timpeall dheisceart na hAfraice – Leosóta, an Namaib, an tSaimbia agus [an Mhaláiv].

Ach nuair a bheidh mé san Afraic Theas, beidh mé leathbhealach go dtí an Astráil! Ar mholadh cara liom a bheidh san Astráil níos déanaí sa bhliain, shocraigh mé ar dhá mhí a chaitheamh sa tír sin i ndiaidh na hAfraice Theas. Déanfaidh mé mo bhealach abhaile trí Shingeapór agus an Mhalaeisia agus, le cúnamh Dé, beidh mé ar ais i mBaile Átha Cliath oíche Nollag!

Ní féidir gach aon rud a shocrú i gcás turais mar seo; ní bhíonn a fhios agat céard a rachaidh ceart nó mícheart ar an mbóthar, cén sórt tinneas aisteach nó maorlathas a chasfar ort, cad iad na háiteanna a dtitfidh tú i ngrá leo, nó cén sórt daoine a chasfar ort.

Ach, ar ndóigh, tá rudaí áirithe is gá a shocrú roimh ré. Ní mór duit eitiltí a chur in áirithe, rud atá iontach furasta le Trailfinders. Caithfidh tú bheith ar an eolas faoi chúrsaí víosa – ní féidir fáil isteach i nGána, mar shampla, gan víosa bheith agat roimh ré. Caithfidh tú cúrsaí sláinte a fhiosrú. Fuair mé an t-uafás instealltaí anuraidh – caithfidh nach bhfuil aon vacsaíniú taistil fágtha nach bhfuil agam cheana féin! – mar sin, ní raibh orm ach teanndáileog a fháil an babhta seo do Heipitíteas A agus B agus teist fola chun a chinntiú gur oibrigh sí.

Ach ansin tá na diabhal rudaí sin ann ar a dtugtar táibléid mhaláire. Is iomaí díospóireacht a bhíonn ar siúl mar gheall orthu, go háirithe ar shuímh ghréasáin taistil mar Lonely Planet (www.lonelyplanet.com) – ní fiú iad a thógáil, ní fiú ach cinn áirithe a thógáil, tá siad go maith agat, tá siad go holc agat agus mar sin de.

Bhí an t-ádh orm anuraidh agus níor tháinig an mhaláire orm, cé go raibh mé i gceantar ardriosca. Ach tháinig an galar ar chúigear nó seisear de na hoibrithe deonacha eile, roinnt acu a thóg na táibléid chéanna is a thóg mise, roinnt a thóg táibléid eile. Níl aon chinnteacht ann nach dtiocfaidh an galar ort má thógann tú táibléid mhaláire, ach dar liomsa nach fiú dul sa tseans ach an oiread.

Leigheas an-daor

Thóg sé beagnach uair an chloig an córas ab fhearr a oibriú amach leis an dochtúir, toisc go mbeidh mé in áiteanna ardriosca agus in áiteanna nach bhfuil baol ar bith ann go dtiocfaidh an mhaláire orm. Níl an leigheas saor – tá costas de thart ar €200 ar na táibléid mhaláire amháin! Ní féidir leat aire rómhaith a thabhairt do do shláinte agus tá seo níos tábhachtaí fós agus tú i mbun taistil.

Is dócha gurb é an rud is iontaí agus is scanrúla faoin taisteal ná “na rudaí aineola” agus na dúshláin a chruthaíonn seo duit, go praiticiúil agus go pearsanta. Tá go leor smaointe agus mothúchán éagsúil ag baint le turas mar seo a phleanáil. Táim ag súil go bhfanfaidh mé féin agus gach duine sa bhaile slán sábháilte. Táim ag súil le taithí den scoth, le cuimhní iontacha, agus le neart ceachtanna agus cairdis, ach tá drogall orm bheith ag súil leis an iomarca! Caithfidh tú muinín bheith agat ionat féin, i ndaoine eile agus i rotha mór an tsaoil!

Is iomaí rud atá ag cur imní orm anois, agus trí seachtaine fágtha agam sula n-imím: An mbeidh dóthain airgid agam? An mbeidh aon deacrachtaí sláinte agam féin nó ag Sophia? An mbeidh deacrachtaí sa bhaile agus mé ar an taobh eile den domhan? An ndéanfaidh gach duine sa bhaile dearmad orm?!

Tar éis gach rud, beidh an cheist a bhíonn de shíor i m’intinn fós ansin i mí na Nollag: “Céard a dhéanfaidh mé anois?!” Den dara huair le hocht mí dhéag, táim ag fágáil poist chun dul ar seachrán timpeall na cruinne. Bíonn imní nua orm gach lá maidir leis an turas seo ach, ar deireadh thiar, is cuma! Táim óg (ar éigean!), saor agus singil agus tá an t-ádh dearg orm bheith in ann tabhairt faoi thuras mar seo. Tá sé de dhualgas orm sult a bhaint as gach nóiméad de, maith nó olc. Mar a dúirt Tolkien: “Not all who wander are lost”.

Is as Cill Mhantáin ó dhúchas í Máire Ní Chuagáin. Bhain sí céim amach sa stair agus sa Ghaeilge i gColáiste na Tríonóide in 2002 agus chaith sí dhá bhliain ag obair le Comhdháil Náisiúnta na Gaeilge ina dhiaidh sin. Thug sí tréimhse ag obair go deonach san Afraic anuraidh agus tá sí ar ais sa bhaile arís anois.

RSS FREAGRAÍ NA LÉITHEOIRÍ  

© Oideas Gael, 2010. Cosc ar chóipeáil. Ní gá go mbeadh na tuairimí a nochtar i mBeo! ar aon dul le tuairimí na bhfoilsitheoirí. Suíomh cóirithe ag MBM. Úsáidtear grafaicí de chuid Fam Fam Fam agus Wikimedia Commons ar an láithreán seo.