Tá agallamh eisiach againn daoibh an mhí seo, a léitheoirí dílse, mar atá agallamh leis an Taoiseach Smaoiseach Iarghaoiseach, Biffo Biata Bithnua. Is fada Balor sa tóir ar Bhiffo chun an t-agallamh seo a chur air, agus is fada Biffo ag seachaint Laoch na Litríochta cionn is go raibh a fhios aige nach mbeadh drogall ná doicheall dá laghad ar Bhalor na ceisteanna crua cráite a chur. In oifigí úra an Taoisigh os cionn an bheáir Tigh Doheny agus Nesbitt’s a chuir Balor an t-agallamh ar Cheannaire Fhianna Fáil, nó tá Tithe an Rialtais díolta ag Bord Snip Nua le Bord Snip Nua ar phraghas an-íseal mar oifigí don iliomad iar-státseirbhíseach atá fostaithe anois ar tuarastal an-ard ag Bord Snip Nua.

Balor: Dia duit, a Thaoisigh. Cad é mar atá an saol agat i ndiaidh na dtoghchán? An bhfuil tú fós compordach mar cheannaire ar an tír seo?

Biffo: Bhuel, a Bhaloir, ní miste dom a rá ag tús an agallaimh seo nach mise ceannaire na tíre ar chor ar bith. Is í Íosa Mhic Ghiolla Mháire an tUachtarán, an Ceann Stáit agus an chéad saoránach. Níl ionamsa ach... uimhir a dó – má thuigeann tú leat mé – uimhir a dó sa chiall is leithne de na focail atá i gceist agam, bíodh a fhios agat – sa chiall nach mbaineann le... tá a fhios agat féin.

Balor: Ó is maith mar a thuigim... sílim. Níl tú ag iarraidh tú féin a fhágáil sa chac – nach é sin é? Ach a Thaoisigh, ba mhaith liom ceist a chur ort mar gheall ar an dá Mháire eile: an Tánaiste agus an tAire. An bhfuil tú sásta leo, nó an fíor do na ráflaí atá ag dul thart: go bhfuil tú ag iarraidh iad a dhíbirt as an chomh-aireacht?

Biffo: Ní fíor ar chor ar bith. Féach gur thug mé bronntanas an duine abhaile chucu ó mo laethanta saoire sa Tansáin: dhá ghabhar mhóra bhána ó lár na hAfraice.

Balor: Ach an fíor nach bronntanais a bhí iontu ag an tús, ach gur iarr tú two goats for two Irish government ministers? Deirtear nár thuig fear na ngabhar gur ag iarraidh na hairí a mhalartú ar na gabhair a bhí tú.

Biffo: Ná creid gach a léann tú sna páipéir nuachta, a Bhaloir.

Seanfhocal nach sáraítear: Mura mbí ach Aire agat, bí i lár an aonaigh leis!

Balor: Bhuel, a Thaoisigh, ní gá dom dul i muinín na nuachtán le fáil amach go bhfuil slad i ndiaidh a bheith déanta ar Fhianna Fáil sna toghcháin áitiúla agus Eorpacha, in ainneoin gur iarr tú ar mhuintir na hÉireann díriú ar cheisteanna beaga suaracha áitiúla agus dearmad a dhéanamh den tsáinn ina bhfuil an tír.

Biffo: Mura bhfuil muintir na hÉireann sásta a n-aigne a dhíriú ar na ceisteanna a ndeirim leo a n-aigne a dhíriú orthu, níl mórán gur féidir liom a dhéanamh faoi sin... go fóill. Ar an láimh eile de, is mise fós an saoiste, an geafar – an boss, an dtuigeann tú – taobh istigh de mo pháirtí féin. Anois, éist leis seo go cúramach: má bhí armshlua beag Blueshirts ag an dream eile chun a dtoil a imirt ar mhuintir na hÉireann fadó, is féidir fós go gcruthóidh mé fórsa de mo chuid féin chun smacht a choinneáil ar mhuintir an Stáit in am seo na héigeandála agus na práinne agus na géarchéime – ar leas na hÉireann, an dtuigeann tú, a Bhaloir; ar leas na tíre.

Thiocfadh liom Willie O Dea a cheapadh ina ghinearál orthu; tá taithí aigesean ar uirlisí troda a láimhseáil. Na Greenshirts a bheadh ar an fhórsa nua, in onóir na hÉireann, an pháirtí agus Chontae Luimnigh. Na Léinte Glasa a thabharfaimis orthu chun Ó Caoimhnis agus lucht na Gaeilge a choinneáil sásta. Thiocfadh linn Ó Caoimhnis a chur ina mbun siúd a bheadh páirtaimseartha san fhórsa, nó níl sé féin ach páirtaimseartha sa rialtas. Cineál de thascfhórsa úr a bheadh sna Léinte Glasa. Cad é do bharúil, a Bhaloir?

Bíodh seanfhocal ag gach seanbhuachaill!

Is iomaí rud a thiocfadh linn a chur i gcrích dá mbeadh fiche míle ball de na Léinte Glasa ag siúl thart le camáin ina ndóideanna. ‘Mar is deas do dhuine a chóta, is deise dó a léine’ a deir an seanfhocal, agus is deise agus is glaise domsa mo léine ná cóta ar bith, má thigeann tú leat mé, a Bhaloir. ‘Is uaigneach an níochán gan léine ghlas’ mar a dúirt an té a dúirt fadó. Is breá liom an seanfhocal sin. Cuirfidh muid an nath sin ar mheirge an armshlua, an ceann a bheas á iompar trí lár Bhaile Átha Cliath Domhnach Cásca seo chugainn.

Agus an bhfuil a fhios agat seo, a Bhaloir? Sílim gur cineál de ghinias atá ionam gur smaoinigh mé ar na Léinte Glasa. Ní chaillfidh muid toghchán eile choíche feasta. Beidh cumainn de na Léinte Glasa i ngach baile agus sráidbhaile in Éirinn. Beidh liosta acu den lucht vótála atá cláraithe, agus díobh siúd nach bhfuil cláraithe fós... hí hí hí. Thig liom é a shamhlú anois; beidh gach duine i ngach baile agus sráidbhaile in Éirinn cláraithe mar bhall d’Fhianna Fáil. Cén fáth nár smaoinigh mé air seo cheana, a Bhaloir. Ó is ginias amach is amach mé.

Fan go dtabharfaidh mo chairde ina gcuid léinte glasa cuairt ar mo chairde ina gcuid léinte gorma mall san oíche, le tairiscint go n-athróidh siad dath a gcuid léinte. Déanfaidh mé cáin ioncaim 98% a fhógairt dóibh siúd nach dtiocfaidh isteach faoin bhratach ghlas, agus ní bheidh stró ar bith orm an dlí sin a chur fríd an Dáil. Agus gailearaí an phobail lán de mo chairde sna léinte glasa le leabhair nótaí ina bpócaí agus déshúiligh thart ar a muineál, feictear dom go mbeidh dhá thaobh an tí ag vótáil ar son cibé bille a chuirfidh mé os a gcomhair.

Meathlú geilleagrach? Cén meathlú geilleagrach? Easnamh de chaoga billiún Euro? Cén caoga billiún Euro? Baileoidh mo chairde sna léinte glasa síntiúis agus ranníocaíochtaí ó lucht an rachmais fud fad na tíre. Chugamsa go pearsanta a thiocfaidh an t-airgead seo ar fad, agus is mise a chuirfidh isteach i gciste an Stáit é. Thig le Standard and Poors a ngrádú maslach ar Éirinn a shá suas ina dtóin ghallda agus ...

Balor: A Thaoisigh, mura miste leat mé á fhiafraí, cad as a dtiocfaidh na storm troopers seo? Mura bhfuil siad le híoc, cá raibh siad am an toghcháin? Má tá siad le híoc, cé atá chun é sin a dhéanamh? Agus cad leis? Agus ceist níos práinní fós, cén áit a bhfaighidh tú fiche míle camán ag an am seo den bhliain, nuair nach bhfuil traenálaithe na bhfoirne iomána in ann cúpla camán sa bhreis a aimsiú ar eagla a mbriste?

Biffo: Ceist mhaith, a Bhaloir. Ceist mhaith. Beidh freagra agam duit ar an cheist sin ar an mhí seo chugainn. Ceist mhaith.